یکشمبه بازار رودسر ( دهه 50)
تقدیم به تمام دوستانی که خاطره های بسیاری از این بازار دارند
یکشمبه بازار رودسر ( دهه 50)
رودسره یکشمبه بازار اوروزان چه خوب بو
شلوغ پولوق همه جا بوکوب بوکوب بو
شهره وسط منبه آبه دور و ور
بساط گوتن دست فروشان سر به سر
لباس فروش ،چکچی فروش لوازم خونه داشت
پیره زنکه یگ عالمه دگ دانه داشت
سنگ پا و روشور و سبزی دانه
یادش بخیر قدیمه چوبی شانه
چوکتره سرشورگل ، گاره مینه پرخاله
گارا دبد خرمیوره و دیدیله و دومباله
چه زرق و برقی داشت اسباب بازی
ردیف نابو عروسک ناز نازی
پلاستیکی توپهای رنگی نابو با بنگوله
آپولویازده ، پیلاستیکی تفنگ و با گولوله
سوبوله دوا ساسه دوا دوای مشته مّمد
دو تومون دوا سازخوریکه نسله کَند
سینما طرف، بساط گوتن سیبزمینی با پیاز
آهنگران بساط گوتن بولو،ماشه، تور و داز
القصه :
بازاره وسط یته سفید لکه داشت
بهمن نامی بو که اوْره دکه داشت
سیمیشکه داشت آجیل با خشکبار
خوب فروشی داشت در او روزگار
گدا بدا زیاد بو روزه بازار
شله احمدهِ داد زا فدین پول ددار
خو کشه بون دو ته عصا بزابو
ایسر اوسر جا و بیجا هیسابو
احمدهِ علیله پول فدین
احمدهِ ذلیله پول فدین
عیال واره پول فدین
زای کوله داره پول فدین
یک طرفم خوجیر آقا هیسا بو
بوقوله خودش بازار نما هیسا بو
دراز عبا سبزه شالو کا تج کولا تبرزین
بولن قد و چارشونه بو مثاله اسبه فرزین
یک عالمه پوله خورده خو جیبه مین صدا دا
جیرا جورا شو خودشه هوا دا
فریاد زا خوجیر آقا بومایا
ای براران بازار نما بومایا
نذری پولانه خو جیبه مین دوگوت
خو دله مینم امری خنده گوت
لنگرو بازار اینشی شمبه و چارشمبه بو
رودسر و کلاچه، یکشمبه و پیشمبه بو
خدا بیامرز همیشه خولبه سر خنده داشت
یاهو گوتو شادیمرا مردمه سر زنده داشت
*******
والقصه:
دیهات جی سیر و پیاز اوردن
مرغانه و اردک و غاز اوردن
جگر فروش آتش مین دومبه و پی تُوادا
کبابدوده مردمه سر هوا دا
دسفروشان از چپ و راست داد زان
کاغذی 5 تومانی همرا خودشه باد زان
مردمه مین حال و هوایی نابو
یکشمبه روزان چه صفایی نابو
دسفروشان عجب فروشی داشتن
شادی مرا جوش و خروشی داشتن
صلات ظهر محصّلان را دوبون
از هر طرف جی هاما دوبون
توماشا چی بازار مین زیاد بو
گرمه سرم بازار یه کم کساد بو
باقر قهوه خونه دی او روز راه نوبو
دوزار نانو، سه قران لوبیاخوردنی، جا نوبو
لزگی آهنگه رادی یو ملته گوشه کر گوت
اوجور شلوغی میانی مشته باقر هونر گوت
سیرابو پس بیرون هامان راضی بون
تماشاچیه ویترین شهبازی بون
یاده مره چیچی کتاب کوی نابو یا که چه جور
عروسک خیمه شب بازی ، مسخ شدگان ، بوف کور
شهبازی هم پیرمرده بالا بلند سفید مو
همیه نا احترام ، با خنده گوت گوفتگو
***************
و ختم القصه:
کفش فروشانه بساط ، پاساژ امیر پور بو
بازاره روزه جی یه خورده دور بو
ماهی فوروشانه ورم سبزی و ماس داشتن
دیهات محصولانه جی تره چی واس داشتن
ماهی نابو بازار مین گوش تا گوش
ماس فروشانم هیسابون دوش به دوش
مشته خانم چادر فیپیته خو کمر نیشته بو
انگشته همرا خالی ماس گولهَ والیشتن دُبو
اخم بوگوته آسمان ابری موسون دپیته
خبر نداره که دوماغه توکه ماس بگیته
یکی داد زا ماهی یکی سبزی یکی گولا ماس
حمامه مونس که گوماتوبون تاس
خوش بحال شوما که مفتی بازار بشین
موزه مونه که دیدن قدیمه آثار بشین
سینمایام خوری یه بازاری داشت
دایما" هم فیلمای تکراری داشت
دوفیلمی نا ایرانی و کابوییه گاوچران
پونزه زاری بلیطه دا دو تومان
مدرسه بو او روز مثاله قفس
سینما نیشتیم تا غروب یک نفس
چن ما یه بار گیر دا ناظم شهابی
مزیه سینمایه بورد حسابی
با این همه چی شادی هایی داشتیم
خودمانیم ، آزادی هایی داشتیم
****************
**************
بندر انزلی 3/10/1394 ساعت 00.30
منظومه سلمان
واقعا عالی بو اقای طاهری
سلام لطف داری آقامهدی جان توی همین وبلاگ نشاس روزان هم هست که شعر دردناک کارهای سخت کشاورزیست . موفق باشی
سلام ،
شیمی دس درد نکنه...چقدر زیبا به تصور بکشه دی او روزانه
سلام شما هم وبلاگ زیبایی دارید همشهری عزیز عکس از نشا برنج که زیاد گذاشتید بد نیست شعر نشاکاری رو هم بخونید http://blousky.blogsky.com/1392/09/12/post-95