نشاس روزان

  ( یک شعر گیلکی به گویش شرق گیلان و حکایت یک برنجکاری در سال 1389) 

نشاس روزان

 نشاس روزان    برسی   نزدیکابو

وقت   شوندره   فرصت  باریکابو

پارو  بزام  بیجارمین  تا   غروب

چه زود بوشو روز هوا تاریکابو

*

تراکتوری بوما  بزه   روتاری

شون وقتام بگوت دِ کار نداری

بوتم    چره ای       آقااااااااا

تومانابونه  مگر   بیجارکاری

*

دنباله   سر   حالا  داریم  لت زنی

مرزگیری    و   دامرده  و سم زنی

کتله    سر   تشت   میان  توم کنی

تومان    پخشاگوتن    و   مرز زنی

*

تِومه   بدیم    اونه   سبز    بلانه

سردسّهِ ور بوشوم تا هگیرم زنانه

بگوت که مو قول بدام ای روزانه

صبر بوکون تی تیوم حالا  جوانه

*

با این همه می  دیل  دبو   هالانه

خدایا        چییسه        مردمانه

آفتابه بون  باغ  و   بیجار  مینی

شکم    چقدر     آدمانه     دوانه

*

گرمش    باد   بومه   تیمان    سرسر   بسوت

آب     گرمابو      تیمان       ریشه       بپوت

هر    کی     بومه     بدی    او    حاله   روزه

پیچ     بده    خو   کله     و   نَس نَس   بگوت

*

 گرمش   بادجی    بسوت    اوسال   امی  توم

گیج    بوم   خدایا   کی  بگوم    کی      نوگوم

همسادیان       بوتن      آقا      غم      نوخور

زیادی   توم   داره فراوان شیمی آسید   معصوم

*

زنگ    بزام      امی       عمو        معصومه

بوتم   امی   کسریه   تُیمان    از  الان معلومه

بوگوت  بعد از  امی   نشا    ابراهیمم  بنیشاس!   

 خو حق  داره  خَونه   چراغ مسجدری  حرومه

*

زنگه  بزام موبایل جی  تراکتوری  سجاده  قربانپوره

 بعد   200 تا  میس کال   دِ    بدی   که     مجبوره

گوشی  وگیت  مو حرف  نزه  اون  در  بمو  ای براااا

می سر  شلوغه  امسال،  شیمی   رایام  که  دوره !

*

  تراکتوری بوتم  بیه    لت    بزنه     روتاری

علیکه  نیته  بوگوت  تو  داماد  مشته  ستاری

بیجار خرابه  تی شی ، گل کشی  هم  که  داره

کنیم  عامو  ای کاره پاییزه روزانه سره  بیکاری

*

 تومان لگه جوراکنی هی تو زنی بوج بونه

شب که بونه تی دست و پا و تی کمر درد کونه

چی فایده با این همه گرانی سم و کود و کارگر

کشتی  کشتی  هندی  برنج  لاکِ لبی  پورکونه

*

چی     دردسر     بدم     تره     که    پارسال

با    چه    عذاب    و    چقدر    قیل   و  قال

تا   که    ببینیم     برنجه    و  بیاریم به جور

بیجارمین    صد   بار      بوبوم   حال  بحال

*

برنجه   درزان   که   جمابو   همیه  یه گوشه

کوه      بگوتیم      بنیم     اونه     سرپوشه

تاریکابو       مهتاب        بمو      بیجارسر

خسته  چی جور که   خون  ،  خونه فودوشه

*

یادش بخیر می پیر مرحوم که خوری تنهایی

بارگوته    اسبه       هرطرف    چهارتایی

تا   اسب   بوشون  کوندیج بون    واگرده

دوروغ   نوگوم   سو  راه    گوته  کوپایی

*

ابراهیم طاهریه خبر بدام که فرده صوب سر

خو تیلیری  همرا  برنجه  بوبوره  جاده  سر

بوگوت   کرایه   هر  صدته  بونه  چهار درز

بوتم      بیه       اونم       فدای     تی سر

*

خدابداشتتپه بگوت برنجه چهارقدم اوورتر

 سید  زکریا عمو  یا  میراقاعمو  بیجارسر

شمره       دردسر      ندم      آقاجاااااان

کمباین بزان جو بنان نوبت کارخانه سر

*

شکر      خدای       صد     هزار   مرتبه

بیجاره کار   با   اون  همه دبدبه و کبکبه

تومانابو          امی       کمر      راستابو

باور   بوکون       جوانابوم     یک   شبه

*

عهد    بوگوتم      سال     دیگر   بیجاره

مناصفه     هدام    یه           نصفه کاره

کمتر   ،    بیشتر     خدا     بده     برکت

تا    که   مصیبت   ننویسم شمره دوباره

*

خسته   ببین   بدرد   بیاردم   شیمی  سر  و کلا

اول  خاسم  فقط   بوگوم   یه  قسمت  از   مرحلا

اما     مره    ببخشید     بوقول    او       قدیمان

 گب        گبه        کشه      پیچه       ماهی کلا

http://blousky.blogsky.com                                                                                                                             

   

****************