سرده آتش

          بنام خدا

     سرده  آتش

 ماقول   تر    یاد   بوما   از  او    زمانه

که   دریا   بزیی   تی  او  دله   نامهربانه

بازاوتی  درده دیلانه  سره  از  او  قدیمان

مره  زنده  بوبو  باره دگر ، شیرینه  دوران

 *********

گونی  که  مو   او    وقت    عجله    بوتم

آبه     پاکی    تی    دسته    سر    فوگوتم

تازه  بوتی   که    تو   بی   می   خاطرخا

مره     یاده     چجور     بو     نوا     نوا

********

 چی دونستم     ترانی    راستی    راستی

 تی سنگه    دیله   مین  مر خیلی  خاستی

درسته   که   تی   همرا   گب      نزابوم

ولی  صد بار  تره    چشمک      بزابوم

مگر   یک   بار   تو   می دسته   بگیتی

یته     کوچه      قدم       ایرا     وگیتی

ترِه   غمزه     گوتی    جیرا   ،  جورایه

نیا   نوتی     امی    کفش    و    کولایه

کولای  کج   بنی  و  راس  بنیش    جان

دِ   الان  تو دونی  و   با   تی    وجدان

           ***********

مو   تی  او     بیوفا     جانی    بمیرم

تی  او   چشمان   زیبا    مین    دمیرم

تو بعد از سی و چن   سال    زندگانی

گونی  که    تر  خاسم  از    نوجوانی؟

بقول   یارو    الآن      بعده    نوغان

تره  بوگوم که مو، تی  کویا   قوربان!

********

اوروزان   که   ندابی    مر    جوابی

می  همرا  حرف  کوتا    زی   کتابی

تی  دسته    بیتمو     می   دسته  نیتی

تری    کادو   بهیم    مر  جی   هنیتی

چی   دونستم   که    دختر    ناز  داره

اونه  دل ،  صد  هزاران   راز    داره

*********

دونستی  که  می   دل   وحشیه وو زیباپرستم

 بجز   تو   هشت   نفر     دیگره      خواستم

 توکه   یک   بار   نومای    مر     پاچیکادی

یته   دام   هم    تو   می      راسر      توادی

بنازم    مو    تی     او      قلبه        صبوره

یاداوتی ،     تو   تی   او    ناز   و    غروره

می جانه  جانه  بی  رحمه    خوش   انصاف

چقد   دیر   زادریم    از     عاشقی       لاف

تره     قسم     به    قرآن    و     به     ایلاف

 که     جایی    دی      ندی    ای  ماجرا گاف

اگر  یک بار  ،  با    تی      شوخه     چشمان

مره     تو     بوته بی      یه    موچّه    مهمان

از   اون    تاریخ   به    بعد  مردم   گوتن  یاد

چه   آهویی   ،  که    صید   بوته    خو   صیاد

*********

چه  خوب   تر   یاده   می  او یادگاری

مره  چی     بومونس  جز   شرمساری

تفنگ، تی  دوشه   سر بیتی    نوشانه

می  دس  تی  دله سر، می  دل هالونه

بزای  تیره   یه راس  می  کوچه  دیله

رها   بوتی   مره     پر زخم    و زیله

*********

الان  دِ    امی   سن     پنجا     اورویه

عجب   زرداوتی   تی  او  سرخه رویه

بقول   سعدی شیرازی    شیرینه   گفتار

که  دایم  بو   خو   شهره   مین   گرفتار

خو    یاره    که    بدی   بعد  از  جوانی

یواش  اون   ری   بوگوت   با   مهربانی

تازه  بهاربَی قدیم  ، دِ  تی  ورق   زردابو

دیگه    ننی   کلِه سر ، امی  آتش  سردابو

         *********

      بنیشتیم      سنگه سر       رو       در     روی     هم

قدیمه     گب      بزیم       از     شادی       و     غم

جوانی            خاطراته              زنده           بوتیم 

یه    بار     گریه     ،    دو    بار    هم   خنده   بوتیم

عجب      درده          دله           سره          واگوتی

ای        تاره           آیی نا         خوب       پاکاگوتی

چه     خوب       بوتی      امی      سنگانه       واوتیم

امی        تنگه        دله          خوب         خونکاوتیم

چه  خوب  بوتی  که بعد  از  اون  همه   سالانه   ساله

بومای   تا   که    می     ور      بیری      تی      فاله

نه     امروز        جایه       حرفه         نه       گلایه

نه         اینی     که           بوگیم          کی   بیوفایه

چی    فایده     دی     بوگیم     تقصیر     کیشی      بو

پلاکاسه    پلا   ،     نیمدانه    بو   یا    پیش پیشی   بو

زمانه      رحم        نگوت            اَمر      دوراگوت

امی           تسکه      دله          غصه        پوراگوت

تره      عذاب       ندی       تره           به        قرآن

تی       سی یا       کیشمیشی        چشمانه       قربان

بهار    عمر    امی     چی     زود        بوشو     زود

امی      چشمانه       چی      دودی       بوشو      دود

                *************

خدایا        شکر        که    بعد       از     انتظاری

خدا    هم        مر              بدا             امیدواری

می     دسته     حق      بنا          دست        نگاری

که       با         اون          بگذرانم        روزگاری

             ********

19/8/94 بندرانزلی